Բարձրակրունկ կոշիկների դաժան աշխարհը

Դարեր շարունակ կինը ձգտել է արտաքին կատարելության: Այն ժամանակ, երբ դեռ տղամարդը իր մարմինը «զարդարում» էր ռազմադաշտից ստացած վերքերով, իսկ արտաքինը` անլվա մորուքով, կանայք, «բանտարկված» լինելով դղյակներում, փորձում էին գեղեցկացնել իրենց կեցությունը տարատեսակ հնարքներով ու նորամուծություններով: Դարերի ընթացքում բարձրակրունկ կոշիկները դրա վառ ապացույցն են. երբեմն նույնիսկ անտանելի տանջանքներ պատճառելով գեղեցիկ սեռի ներկայացուցիչներին` բարձրակրունկները շարունակում են գերել ու գրավել միլիոնավոր մարդկանց ուշադրությունը:

Ինչպիսի՞ն է դաժան ու գեղեցիկ բարձրակրունկ կոշիկների պատմությունը:

Գեղեցիկ սեռին, թերևս առանց որևէ խղճի խայթի, կարելի է մեղադրել գողության մեջ: Կանայք տղամարդկանցից հասցրել են «գողանալ» վարտիքները, կարճ սանրվածքը, քաղաքականությունը, ավտոմեքենա վարելը և նույնիսկ բարձրակրունկ կոշիկները: Այո, ճիշտ հասկացաք, կրունկներով կոշիկներն ի սկզբանե տղամարդու մենաշնորհն էին: Սակայն կնոջ խորամանկության և պատմական էվոլյուցիայի ընթացքում եգիպտական փարավոններից մինչև դիզայներ Alexandr McQueen-ի ժամանակները տղամարդիկ վերջնականապես զրկվեցին կրունկներով կոշիկ հագնելու հաճույքից :)

Դեռևս մ.թ.ա. չորրորդ հազարամյակից սկսած Հին Եգիպտոսում առաջ եկան կրունկներով կոշիկներ. այդ հեռավոր ժամանակներում միայն փարավոններն ու նրանց որդիներն էին կարողանում հագնել պապիրուսից պատրաստված սանդալներ: Ապա կրունկներով կոշիկներ սկսեցին հագնել հողագործները. կրունկներով ավելի հարմար էր քայլել թաց հողի վրա: Ավելի ուշ կրունկների « կանացիացման» մեջ մեծ դեր խաղացին թեթևաբարո կանայք, ովքեր կոշիկների տակ մեխեր էին ամրացնում այնպես, որպեսզի հատակի վրա դրանք թողնեին «հետևիր ինձ» «հետք-բառը»:

Վաղ միջնադարից մինչև Վերածնունդ բարձրակրունկ կոշիկներին ավելացավ մեկ այլ ծայրահեղություն` երկար քիթը: Ըստ միջնադարյան բարքերի` որքան հարուստ էր տերը այդքան երկար պետք է լիներ կոշիկի քիթը (կոշիկի ամենաերկար քիթը հասել էր մինչև 65 սմ): Վերածնունդը նպաստեց առաջխաղացմանը որ միայն կերպարվեստ աշխարհում, այլև նորանոր մտահղացումներով հարստացրեց նորաձևության թատերաբեմը: 1500թ. ֆրանսիական և իսպանական արքունիքի նորաձև կանայք է՛լ ավելի գայթակղվեցին բարձրակրունկ կոշիկներով: Իմիջիայլոց, այն ժամանակվա ռեկորդ են համարվում 70 սմ բարձրությամբ կրունկները: Բնականաբար, գեղեցկության այդպիսի զոհերը պահանջում էին մշտական երկու սպասուհիներ, ովքեր կօգնեին տիրուհուն ոտքերի վրա կանգնել: Գիտնականները մինչև այժմ էլ քննարկում են, թե ով էր նման սադիստական նորաձևության հեղինակը, սակյան կասկածների մեծամասնությունն ընկնում է Լեոնարդո դա Վինչիի հանճարեղ մտքի վրա: Այդպիսի բարձրակրունկ կոշիկների երկրպագուներ են եղել Մարիա Մեդիչին (արյունարբու Մերի) և Քեթրին Մեդիչին:

Ֆրանսիական ռոկոկոյի դարաշրջանում կախարդության մեջ մեղադրվող կոշկակար Նիկոլաս Լոստաժը «Արևի արքա» Լուի XIV-ի համար ստեղծեց հատուկ բարձրակրունկ կոշիկներ, որոնք հետագայում հայտնի դարձան որպես «լուի» կրունկներ: Այդ կոշիկների կրունկների վրա Լեստաժը հնարամտորեն պատկերում էր ռազմական տեսարաններ և նախշեր: Սակայն նույնիսկ այդ ժամանակ կանայք հեռու չմնացին սպիտակ նախանձից և հնարամտորեն սկսեցին հագնել մինչ այդ տղամարդու համար նախատեսված «լուի» կրունկներով կոշիկներ: Ապա «Արևի արքայի» սիրուհի Մադամ Պոմպադուրը հորինեց սեփական օգտագործման համար նեղ երկար «Պոմպիդու» կրունկները, որոնք, իմիջիայլոց, օգտագործվում են նաև ներկայիս կոշիկների համար: Մի քանի տասնամյակ անց, երբ գլխատեցին նորաձևության և բարձրակրունկ կոշիկների մոլի երկրպագու, Ֆրանսիայի թագուհի Մարի Անտուանետին, սերը կրունկների հանդեպ ժամանակավորապես մարեց:

Այժմ նորաձևության արդյունաբերության շարժիչներից մեկը բարձրակրունկ կոշիկներն են: Աշխարհի ամենաթանկ բարձրակրունկները պատրաստված էին Սթյուարտ Վայցման դիզայների կողմից` 642 սուտակներով (ռուբին) և արժեին 1,6 մլն դոլար: Վերջերս «House of Borgezie» զարդեր արտադրող ընկերությունը միլիոնատերերի ուշադրությանը ներկայացրեց երեսուն կարատ քաշով 2.200 ադամանդներից պատրաստված բարձրակրունկ կոշիկները: 200.000 դոլար արժողությամբ այդ կոշիկները դիզայներ Քրիստոֆեր Մայքլ Շելլիսի մտքի թռիչքն էր:

Այժմ այնպիսի հայտնի նորաձևության տներ, ինչպիսիք են Giuseppe Zanotti, Christian Louboutin, Manolo Blahnik և Jimmy Choo, կենտրոնանում են բարձրակունկ կոշիկների արտադրության վրա: Այս ընկերությունների տարեկան շրջանառությունը հավասարվում է 1,5 մլրդ դոլարի:

Եվ անկախ ողնաշարի խախտումներից, հոդացավերի և ոտքերի ոսկրերի կոտրվածքներից` բարձրակրունկ կոշիկները եղել են, կան և կմնան կանացիության և հմայքի կենդանի ապացույցներից մեկը: Իսկ բարձրակրունկ կոշիկների «կարճ» պատմությունն ավարտեմ իմ ամենասիրելի` «Սատանան Պրադա է հագնում» ֆիլմից բարձրակրունկ կոշիկների մասին լսած ամենագեղեցիկ, հմայիչ և դաժան ճշմարտությամբ.«Դու սատանային վաճառեցիր քո հոգին այն ժամանակ, երբ առաջին անգամ հագար Ջիմմի Չուի կոշիկները»: